O Cartolinha - L Cartolica
Pesquisa

Amanho de l curriclo
Por António Rodrigues (Professor), em 2012/09/12891 leram | 0 comentários | 113 gostam
La mie perpuosta, stribada ne l rigor i n’eisegéncia
Por Alfredo Cameirão

Diç que ls curriclos de ls nibles de ansino de la scuola pertuesa ban a ser amanhados, mas peç que inda nun hai muita certeza cierta de cumo ban a quedar. You, cumo cidadano cunciente i repunsable, más a más, cumo parte antressada, apuis de muito cabilar i anté acumparando cun sistemas d’outros paízes que debemos copiar cumo modelos de sistemas eiducatibos cun poucos çperdícios, cumo seia l Burkina Faso i la Papua Nuoba Guiné, deixo eiqui la mie perpuosta, stribada ne l rigor i n’eisegéncia, que, an buona hora, l Senhor Menistro scolhiu cumo bigas de l nuosso eidefício eiducatibo.
1º ciclo
Zarriscar todo l que stá. Nun hai dinheiro, nun puode haber palhaçadas. Fáien-se uns eisames alhá para maio i ye solo esse més que se le paga als porsores. Ne l restro, daprende-se a fazer uas cuontas, mas nada de cumplicado, cousas simples i que fágan falta ne l feturo, como tal, daprender a debedir ua sardina por trés.
Ls melhones poupados puoden-se gastar an cousas amportantes i que mos fágan berdadeira falta, por eisemplo, barcos de andar pul fondo de l mar, quier dezir: submarinos.
2º ciclo
Cuntinaçon de l curriclo de purmeiro ciclo, mas cun cuontas más cumplicadas, cumo tal, debedir 300 ouros puls 30 dies de l més.
Más ua porrada de melhones poupados que puoden ser ambriados para ajudar quien más percisa, ls bancos.
3º ciclo
Pertués – Un daprende a falar el solo, oubindo ls outros. Ler i screbir tamien se puode daprender assi. L restro ye poetas zarolhos i remancistas que nun rigulában muito bien, l más de las bezes acabában a dar un tiro ne ls miolhos. De más a más, yá se morrírun todos. Peligroso i sien antresse. Para zarriscar.
Anglés – L serbiço que se fai na scuola puode-se muito bien fazer de berano, na praia, a falar culs “camones”. De más a más, ls quemandos de l Counter Strike i de l Big Theft Auto tamien ajúdan. Zarrisca-se.
Francés – Daprende-se n’apanha de ls tematos, de la fruita ó noutra cuntrata qualquiera. Zarriscar.
Spanhol – Ye cumo l pertués, mas an beç de dezir Coca-Cola diç-se Cueca- Cuela. Zarrisca.
Stória – Todo mundo giente que yá se morriu, anté dá grima. Más a más, nun ye preciso andar a matar la cabeça para saber cumo se bibie n’Eidade Média, nun tarda nada, bonda mirar al redror para saber cumo era. Para zarriscar.
Geografie – Anton i l Gogle Earth i l Mappy.com para que sírben?! Nua sociedade moderna i zambolbida chega bien. Zarriscar.
Ciéncias Naturales – Quien ye que nun sabe çtinguir ua xara de ua pescada de bacalhau? Daaaahhhh. Zarrisca.
Física – Quei diabos de antresse ten saber quanto tiempo tarde ua piedra a cair ne l chano? Zarriscar.
Química – Ye la tal daqueilhas cousicas inda más pequeinhas que ls “Glutones” de l Presto de lhabar la roupa. Calhando nien eisísten. Yá algun de bós algua beç biu un átemo? Zarrisca.
Eiducaçon Bisual – Caramonos, castros i triánguelos. Quien ye que nun sabe zenhar un quadrado ó fazer un bolhica? Zarriscar.
Eiducaçon tecnológica – Daprender a spetar un prego? Agora yá hai “pregos cola”, naide percisa de andar a sfuracar. Zarrisca.
Música – Anton agora que la malta ten toda i-phone ye que mos íbamos a poner a tocar xilofone? Zarrisca.
Eiducaçon Física – Bonda bien mercar “LA Bola” i donde an onde dar ua fugida para acaçar la carreira. Zarriscar.
TIC – Anté me dá la risa. Quereis ber que ye preciso un porsor para ansinar a antrar ne l Facebook i poner uns retratos an pelache. Zarriscar.
Artes – Parece-bos que las cousas stan para esses luxos?! Zarrisca.
Matemática – Amportáncia cimeira. Cumo poderemos nós custruir ua sociedade lhibre i repunsable sien saber la çtinçon antre un houmomorfismo anjetibo i un houmomorfismo subrejetibo. Más a más, quien sabe matemática puode siempre chegar a menistro. Oumentar la carga hourária anté nun haber folga.
Secundairo
Zarriscar todo. Ye un açagar de dinheiro cumpleto i arrematado. Bonda fazer uns eisames ne l fin de l anho; quien sabe, sabe, quien nun sabe, pacéncia. Para fazer massa i assantar tejolo bóndan bien las cumpeténcias de l bázico.


Comentários

Escreva o seu Comentário