|
| |||
| Ua bejita a Segóbia. | |||||
| Por António Rodrigues (Professor), em 2019/07/30 | 953 leram |  0 comentários |  172 gostam | ||||
| POR HELENA RODRIGUES Pul dous de julho de 2019, a las 5.30 de la manhana, ls studantes de mirandés de la Scuola Básica i Secundaira de Miranda de l Douro fúrun de carreira a Segóbia, (“Segobriga”, ne l tiempo de ls romanos). | |||||
 Assi que cheguemos, l purmeiro sítio turístico que bejitemos fui la catedral de Santa Marie, tamien apelidada de “La Dama de las Catedrales”, por bias de ser guapa, taluda i de haber sido l’ última a ser feita, an Spanha, ne l stilo gótico, apesar de ser solo terminada ne l seclo XVIII. Ls alunos de mirandés tamien tubírun l’ouportunidade de íren a ber ua sposiçon de pintura de arte sacra, de antre ls seclos XVI i XVIII, que staba na sala, an baixo de l claustro. De buolta a las rues i a las caleijas desta cidade antiga, ls studantes fúrun anformados de que la próssima bejita serie al castielho de la “Disney”, ou seia, al afamado alcázar. La gente de Segóbia diç que Walt Disney se tenerá anspirado nel para criar l castielho de la guapa adrumecida. L alcázar, durante muito tiempo, fui la casa de ls percipales monarcas de castielha i de la dinastie de Trastâmara. Tamien fui alhá coronada Sabel I, reina de Castielha i de Lhion. Pul meio de ls quartos de la rialeza, de las salas angalanadas, alguas al stilo árabe, outras arrodeadas de brasones cun figuras de la stória de la Península Eibérica i de Spanha, até un bitral alhá staba, an que aparecie, stranhamente, repersentado D. Juan I de Pertual; outros tiempos, outras lhuitas! Ls más curjidosos inda podírun chubir a la torre de l alcázar para apreciar las bistas i l carreironico por donde passaba l ambergonhado riu Eresma. A la hora an que salímos de l castielho, yá se sentie l rechino de l sol i ls bejítantes, precurando las selombras, deixórun-se ir pulas rues anquelubradas de Segóbia i fúrun-se derigindo a la parte bielha de la cidade. Afinal de cuntas, todas las rues ban a tener a Roma. I nun ye que apuis de habermos andado un cachico, podiemos ber agora un acaduto taludo que atrabessaba parte de la cidade bielha romana de Segóbia. L acaduto cunta cun 818 metros de lhargo, ten 128 arcos i ancóntra-se bien cunserbado, capaç de anchir las bistas a qualquier turista. L acaduro ye un anfeite halbelidoso, urdido todo el cun blocos an piedra que ancáixan uns ne ls outros de maneira certica, purfeita. Durante muitos seclos, l acaduto serbiu para fazer chegar l’auga ancanhada als habitantes de la cidade de Segóbia. Inda que tenga sido feito durante l tiempo de ls amperadores Domiciano, Nerba i Trajano ye, pula cierta, l’obra más amportante i amponiente de l’angenharie cebil deixada puls romanos na península Eibérica. Terminadas las bejitas pula parte de la manhana, fumos antregues a la lhiberdade para ir al almuorço: uns a cuntas cun l famoso McDonald’s, outros, más abintureiros, fúrun a saber adonde se comie l afamado “cochinillo”, i l “cordero lechal” assados an forno de lheinha, cumo manda la tradiçon Segobiana. Pula tarde, alguns studantes aporbeitórun para bejitar alguns menumentos, passear pula cidade, ir a las compras ó anton, para çcansar a la selombra ou a la fresca nua splanada, buendo un çumo, saboreando un gelado. Cheguemos a la carreira, siempre “calentica”, inda algo cansados, mas, pula cierta, contentos de la bida. La benida fizo-se cedo i a horas, l subreciente para un chegar a Miranda i cenar a la hora de berano, que Segóbia bista fui. | |||||
Mais Imagens:
| |||||
| Comentários | |||||
